時間過得真係好快，轉眼財爺個位已經懸空近半個月，阿董當日「心中嘅人選」，唔知係咪個個都派檸檬，所以到𠵱家重未公布到人名，睇怕葉澍堃重要頂多一陣。
八方日前同嶺南大學校長陳坤耀傾開，佢講笑話唔敢說三道四，為新財爺嘅人選指手畫腳，以免俾人話佢恨做財政司司長。
講兩講，陳校長重大爆內幕，話喺阿松辭職前，特區政府三個主管財金及經濟系統嘅問責高官，包括阿松，馬時亨同埋葉澍堃都係佢當年港大嘅高足，可惜佢嗰陣只係教咗佢哋點應付通脹，冇教佢哋點搞通縮，大有自責嘅意思。
咁其實都唔怪得陳校長，因為當時香港都冇通縮問題，有都只係通脹，重有，如果有人搞得掂通縮，怕且都攞咗諾貝爾獎。
八方於是請教校長，應該點救港？佢好認真咁話，要講嘅過去一年都見晒報，叫八方自己去翻翻。好彩八方都記得幾招，就係一定要宏觀啲睇，一定唔好修修補補，小恩小惠。
班徒弟未夠班，睇怕呢鋪要師傅出馬；不過，陳校長好似志不在此，佢噚日一早就飛咗去泰國放假，總聲明係帶埋啲功課去做，並冇偷懶。
老董唔搵陳校長出山，唔知係咪怕冇人管住嶺大？呢輪咁嘅勢頭，人人都唔肯做，睇怕葉澍堃同唐英年都要有心理準備俾老董拉夫。
傳真︰2623-9278
電郵︰