葉劉辭職後，氣勢如虹，睇吓佢上京，出席工聯會、中總餞別宴嘅巴閉法，下屆特首，佢極有希望。你知啦，特首唔係我哋選出嚟嘅，江握手都係欽點嘅啫，當時識得董先生嘅人，邊有今日識得葉劉咁多呀。現今霍老企硬佢後面，只要大叫一聲：「我挺葉！」請問重有冇其他人有把握同葉劉爭鋒？你唔好以為葉劉民望低（重低過梁錦松），就唔會有選舉委員會嘅委員選佢，呢八百名委員之中，大部份係好醒目，好識得與上頭保持一致嘅精仔精女，腦筋與我哋啲蠢人唔一樣，我哋話黑色，佢哋會睇到白色，我哋話葉劉民望低，佢哋會推葉劉做民族英雌（葉劉送女去美國讀書，佢話：「無論我去到哪裏，都不要忘記我是中國人。」）
葉劉在中總送別會上講：「社會上也有一點歪風，有些人顛倒是非，混淆黑白。」點止一些人呀，多過五十萬人顛倒是非㖭。呢幾十萬人之中，六成係大學畢業人，包括葉劉嘅港大同學校友教授在內，呢啲人都混淆黑白，唔怪得香港經濟唔掂啦。下一屆政府最好由葉劉做特首，鄭耀棠做財政司，曾鈺成做政務司，鄔維庸做衞生福利局局長，梁富華做工商局，黃宜弘做教育統籌局……又睇吓呢班明白是非嘅人會將香港搞成點？葉劉賣廣告啲中文唔多掂，整兩句：「友情常在，香港常存」點通呀？香港梗係常存啦，洪荒時代已有，即使講甚麼開埠亦已有一百六十年，葉劉去美國，祝「香港常存」，直情係攞景。【更正】昨日本欄文章「彼得原理」一詞，英文該為Peter'sPrinciple。