隊友動之以情挽離心
求驗客手記：維杜卡累球證孭鑊

我求大俠上個禮拜咪講過列斯前鋒維杜卡響友賽發火，好彩當時執法球證網開一面，令佢逃過停賽命運。原來件事重有下文，當時球證基爾因無秉公辦理，而被足總指控，真係好人難做囉。
話說當日列斯對約克郡場波，維杜卡犯規完攞黃牌後，再搵個波掟人。假如個判官當時送多個黃牌趕佢出場，佢就要響季初停賽；可能球證見係友賽，結果放佢一馬。判官深明大義，不過規矩係咁又真係應該揸正嚟做，好多嘢一開先例就有排煩。
講開維杜卡，呢位仁兄最近態度麻麻，好多人覺得佢係博列斯賣走佢。列斯隊友似乎都察覺到呢一點，隊長馬迪奧公開話冇咗維杜卡唔得，即管睇吓佢動之以情，留唔留得住維杜卡個心啦。

「鬼盤」響頭炮
蘋果波經由噚日起大改革，響貼士欄度設「鬼盤」，第一次叫大家小心甲A雲南紅塔上盤，即響頭炮。呢場波好多人以為雲南紅塔贏硬，又有皇馬球星路過帶旺，行情以為讓一球冇問題，但實情係佢哋有三主將停賽，終於由讓一球改為臨場讓半/一，咁「鬼」，重唔畀我哋捉到正！

法迪加同國米傾掂數
國際米蘭終於同懷疑心臟有問題嘅法迪加傾掂數，重新確認收留呢個塞內加爾中場，條件係佢每三個月要接受檢查一次，確保健康無問題。國米突然咁順攤准法迪加歸隊，唔多唔少係因為尹達美迪最近受傷，左路需要人手用。法迪加應該多謝尹達美迪囉。

艾馬臣借機跳草裙舞
羅馬中場艾馬臣明知車路士有心撬佢過檔，乘機利用呢個機會向羅馬發最後通牒，講明冇人工加就即刻走頭。另外，卡卡所屬嘅聖保羅亦同AC講條件，話如果AC唔肯出九百萬鎊（之前開價雙倍），轉會就冇得傾。巴西佬好波人所共知，估唔到連講價都咁醒。

高比案上網睇真啲
高比仔被控強姦案將喺下禮拜三開審，由於呢單案好轟動，所以好多傳媒同球迷向鷹縣法庭查詢。為咗應付大量嘅查詢，科羅拉多州司法部將會喺今個禮拜內，喺個網頁www.courts.state.co.us 詳細公布所有呢個案嘅資料同進展，關心高比仔嘅球迷到時就可以上網睇真點喇！