特首噚日見傳媒代表聽取施政意見，新聞自由當然係重要話題，重因此擦出火花。話說老董要聽意見，有左派報章老總搶先發言，矛頭對準新聞處同香港電台。佢先來一句「新聞處淨係識錄音，少咗發新聞稿」，再補一句「香港電台嘅作用要諗一諗」，結論係「政府聲音市民聽唔到」。
老董未及回應，有電視台大佬已馬上舉手要發言，大叫「港台角色唔應該搞」。電視台大佬強調言論自由、新聞自由好重要，不能亂來，「港台用嘅係納稅人嘅錢，係代表廣大群眾，唔好混淆佢代表政府。」正氣凜然！
風頭火勢，老董精靈地冇插嘴。但佢雖然多次強調自己重視新聞自由，席間卻不斷叫傳媒大佬「幫手」、「幫手」，總結發言時又有一句香港現時「嚴重缺乏正面輿論的引導」，傳媒要留神啦！
噚日又有傳媒高層向老董告御狀，大數沙士期間醫管局新聞發布、消息發布之差，為全港行家出一口烏氣。如果老董指令整頓醫管局公關新聞組，九成九記者會支持佢。
傳真︰2623-9278
電郵︰