近排樂壇貪污案成為全城熱話，呢單嘢牽涉好多唱片公司同電視台高層，其實除咗樂壇之外，電視圈有位女高層都攞咗唔少着數，佢經常開晒口同啲藝員講，話自己好鍾意Tiffany啲名貴首飾，啲藝員為咗可以有得撈，自然要識做啦！
記得早前有一位女藝員，用咗成萬蚊買件好有名嘅擺設送畀呢位電視台女高層，佢收到禮物之後，即時拆嚟睇，一發現件禮物唔係紅色，即刻隨手丟咗，搞到送禮畀佢嘅女藝員好鬼尷尬！事後有人提醒個女藝員，下次送嘢畀呢位女高層最好送紅色，如果唔係得罪咗佢，唔使旨意有運行！
呢位女高層之所以咁惡，無非係因為佢喺電視台入面有權有勢，其實一個電視台咁樣造就啲高層收受利益，好應該切實檢討吓！
成龍主演嘅電影《飛龍再生》原本叫《不死人》（Highbinders），不過成龍覺得呢個名唔好意頭，所以喺老闆楊受成安排下，搵咗白龍王幫套戲改名。成龍喺戲入面為咗救靈童而浸死，亦係佢第一次扮死人，重要瞓殮房，但佢之後當然可以翻生啦。
張達明、珈潁同駱樂等，噚日上咗遊艇為亞視節目《拍住時代走》宣傳，不過達明嘅風頭就明顯俾珈潁同駱樂嘅三點式泳衣搶晒鏡。達明話今次拍呢個節目，有好多機會遊埠，好似早排去日本咁，令佢體驗良多，除咗瞓過新宿公園外，重有機會同相撲手玩咗場友誼賽。
白韻琴同男友謝偉俊前晚喺銅鑼灣開派對，慶祝律師樓擴張，不過白姐姐話七月一日有人聯同合共三百五十人登廣告，內容支持鄭經翰開咪再做節目，並指摘一對「癲鳳儍蟲」男女，有逃稅傷人前科，重支持二十三條，白姐姐話個廣告係指佢同謝偉俊，所以發咗律師信，要求佢哋道歉同供出主謀。
吳鎮宇前晚出席《囗雄》首映時透露，早排佢喺北角嘅政府物料供應處拍電影《心寒》，特別將嗰度改裝成停屍間，鎮宇話：「有個男臨記全裸瞓喺度扮死屍，我要對佢指指點點咁，人哋都唔尷尬，我點尷尬？否則佢死都唔眼閉呀。之前有套戲喺嗰度拍，取景一日發生六次意外。」
麥浚龍（Juno）噚日喺新世紀廣場出席電影《數碼暴龍》宣傳活動，佢啱啱入行嗰陣，有fans話過佢個樣似恐龍，問佢係唔係因為呢個原因所以成為套電影嘅代言人，Juno一啲都冇嬲咁話：「我唔知有人咁講，但最緊要係啲細路仔睇得開心。」而噚日北京電視台都有嚟採訪佢，佢公司打電話問過晒先畀Juno接受訪問，非常小心。
