昨日收到經紀陳電話，佢把聲好興奮，猛話一早講咗富豪（078）新股出籠之時有得炒，家陣隻股果然開車，而且氣勢如虹。不過，小初真係唔抵得經紀陳懶巴閉咁款。
經紀陳早前曾話，富豪以每股4.8仙，配售1.8億股新股，集資淨額840萬元，貨源落在強者手中。上周新股出籠後，富豪當堂唔同晒，十分有睇頭，日日有成過幾千萬銀成交，一改以往作風。
富豪噚日逆市大升9.68%，收0.068元，成交股數有成4.2億股，成交金額3200萬元。
經紀陳話，隻股表現咁勁抽，皆因原本揸Fit人搵咗班大陸炒家落場幫手，所以表現先咁神勇，尤其喺盤路方面，完全同以前唔同。
雖然富豪股價升咗唔少，但小初發覺經紀陳似乎仍未肯食胡，佢話一來見到公司老闆近日頻頻出嚟見人，話債務重組就快搞掂；二來公司重臣亦密密曝光，為賣樓做騷。既然人哋咁大陣容，斷估都唔會咁快就炒完，但偶有回吐就唔出奇。
慕容小初