無綫有意修改合約禁止合約歌手亮相有線電視台一事，搞至滿城風雨，昨日歌神張學友首次就事件開腔，直斥此現象不健康，他又鼓勵其他電視台做好音樂節目，讓歌手多些宣傳渠道。而律師黃國桐則認為無綫此舉，可能會違反廣播條例。
有線娛樂新聞台日前啟播，無綫即時下令旗下合約歌手要嚴守合約，若違規亮相其他電視台便會遭即時解約，令不少歌手接受電子傳媒訪問時都特別小心，拒絕接受有線訪問。不過，亦有歌手以國語接受有線訪問，除郭富城外，昨日鄭秀文也接受了有線訪問，而張學友更指摘歌手只可亮相一間電視台的現象不健康，更鼓勵其他電視台搞好音樂節目，不要讓無綫獨大。
其實學友九一年曾因亮相亞視慈善節目而遭無綫封殺，現時在香港樂壇已達歌神地位的學友，昨日到灣仔會展舉行的書展，接受新城節目《瑪莉會客室》訪問。
被問到無綫禁止歌手亮相有線一事時，學友即道：「我都有留意呢單嘢，咁樣係唔健康，歌手宣傳冇可能只亮相一個台㗎嘛！我覺得最終呢啲限制會冇㗎，只要傳媒開放啲，就唔會再存在呢啲問題，係香港先存在呢啲嘢，我好多年冇簽無綫。」
學友又鼓勵本港其他電視台搞好音樂節目，就不會讓無綫繼續獨大，學友說：「我希望其他媒體做多啲好嘅音樂節目，𠵱家開始做，咁不出幾年後，呢種情況就會消失。」
而黃國桐律師昨日接受本報電話訪問時，認為無綫禁止旗下歌手接受有線娛樂新聞台訪問，有可能觸犯了廣播條例中的第十三條「禁止反競爭行為」，該條例的目的是為了防止壟斷。黃國桐說：「我個人覺得係違咗例，無綫同藝人簽合約，合約寫明藝人唔可以喺第二個台出鏡，係為咗保障自己嘅利益。但係利益同競爭係兩回事，例如歌手咁，佢唔係去咗第二度唱歌跳舞，唔通講自己屋企隻狗有冇事都唔得？」
黃國桐續說：「但究竟係咪違例，最後嘅決定權係廣管局，佢哋認為係就係，主觀因素都好重要。我認為無綫咁做就係封殺，參考番外國嘅例子，藝人同公司簽約，都會講明係某一種演出。唔可以做訪問，係剝奪同扼殺咗藝人嘅自由，冇理由咁樣。」
有線節目部執行董事徐小明昨日在電話回應說：「好多謝學友嘅鼓勵，佢嘅說話對我哋嚟講係一種鼓舞，相信亦有好多歌星有咁嘅渴望。我亦好多謝何定鈞（無綫總經理）講解得咁清晰，咁以後無綫有約嘅歌星我哋咪唔做專訪咯。我哋努力之餘，亦希望同業好似亞視、鳳凰衛視咁都一齊推動，唔好側埋某一個機構。」
問到有線可會就廣播條例十三條採取行動時，徐小明說：「我哋會正視呢件事，𠵱家研究緊，我個人希望同業可以互相尊重，各有各做，就算有呢條例，都唔使引用。」
至於鄭秀文昨日在淺水灣出席電影《戀上你的床》慶功宴時，接受了多間電子傳媒的訪問，其中包括有線在內，不過有線節目主持人訪問時刻意拆除咪牌，而鄭秀文更煞有介事地主動對在場記者說：「我冇攞咪㗎！」
另一方面，無綫昨日召開音統會會議，綜藝及體育科經理黃家亮表示今次會議只是討論《勁歌金曲》有關「勁歌金榜」的事宜，而歌手亮相其他電視台的事，應向藝員科查詢。
而鄭裕玲前晚在將軍澳電視廣播城，錄影節目《不一樣的對話》，談到無綫禁止合約歌手亮相有線一事時，她說：「咁都要尊重合約精神，TVB係上市公司，要向股東同股民交代，都要保護自己。我自己就冇接受過有線訪問，但講國語嘅就有。」
此外，學友昨日接受張瑪莉訪問時，透露下月三日是其愛女張瑤華的三歲生日，他說：「我二號去台灣出席金曲獎，三號趕返嚟慶祝，我買咗家居用品送畀佢。」
採訪：李珮洳、張止寒、王崇穎
攝影：仇志德
