大戶噚日轉開8月份淡倉，將8月期指㩒低121點，收報10015，較現貨收市10121，低水逾百點。
投資者似對今日孫公的未來樓市報告，不寄厚望。據聞，港府會以每年2萬個新單位作為供地指標，因樓市在過去18年，在最差的一年都可賣出2萬個單位。如果政府真係咁樣諗，就可能會出錯招，首先樓市最差的時候可能未出現，樓市可能繼續差落去；第二，如果2萬個單位剛好滿足市場需求，則只令樓價平穩，不足以刺激樓價反彈。其實，政府最好就唔做嘢，若要做就唔該再狠啲，唔使搞到成日唔湯唔水。
中意控股（1198）自從5月獲霸菱入股後，股價一直造好，噚日再升7.45%，收2.525元。據聞公司好快會有動作跟尾，如無意外會係配股集資。當時霸菱以每股1.50元買入500萬股，現在帳面獲利512萬元。黑客話，此股可能炒上3元以上才配股，應該重有水位。中意在內地賣家具，隨着內地經濟強勁增長，內地人捨得使錢在家居布置方面，所以中意業務對芬佬頗有吸引力。
卓悅（653）噚日成交大增至7375萬元，重勁過上市首日，單日勁升22%，收報1.32元。Cookie話，上市有份圍飛嘅炒家其實想散貨好耐，但散戶接貨並不踴躍，現在難得內地放寬市民來港旅行消費，加上內地人又好鍾意在港掃化妝品，一眾炒家唔趁機興波作浪重等幾時？
阿虎