繼日本三菱車廠公布咗2003年上半年汽車製造、銷售及出口數據，表現令人大感滿意之後，份屬同鄉嘅萬事得汽車，亦於日前公布有關資料，成績亦見不俗呢！
喺汽車製造方面，萬事得於今年上半年喺日本本土生產線，合共產製出385,167部新車，較去年同期升1.2%，其中私家車佔350,497部（升0#.2%），而商用車則佔34,670部（升12.9%）；海外生產線方面，則合共產製出114,224部新車，升幅高達48%。汽車出口數量亦錄得1.6%升幅，達259,572部之多，其中私家車佔256,137部（升1.9%），但商用車則只有3,435部（下跌15.9%）。
至於響日本本土市場所售出嘅車輛數目，亦錄得高達9.8%嘅升幅（達146,592部），若以單一車型計算，銷售成績最理想嘅包括有Demio（即港版Mazda2），數目多達48,012部，較去年同期大升85.3%，而備受港日兩地車迷追捧嘅Atenza（即港版Mazda6，見圖），錄得升幅高達214.4%，合共售出14,128部新車之多；同時，新近推出嘅RX-8高性能跑車，亦於今年上半年推出後，售出多達6,680部新車，成績可謂令人鼓舞呢！