成功轉型的Emme黃伊汶絕對是個貪心鬼。舞步愈排愈辣，新舞新MV《ShowAreLove》未有得睇，目標卻是要跳到跟另二位Dancer「三位一體」；書展出書《伊癲園》，講自己各方面的設計、又幫《長夜不眠》畫插畫，正式向才女牌坊出發。咁巴閉，現在就給你20分鐘，親自連選料連勞動，搭一張「戀愛床」，睇過是否真材實料，引到途人戀上你的床？
記者：陳慧敏攝影：周旭文
場地：銅鑼灣G.O.D
話明限時間，估唔到Emme居然悠悠閒，記者決定唔催促，跟在後面等夠鐘睇好戲。好，開始計時，GO！
購物時段
注重形象的Emme當然唔會搞出推着購物車瘋狂極速掃貨的場面。一直保持住自信十足的樣子，伸長條腿大步走，而雙眼就四圍掃……5分鐘過去，俾佢對大眼掃過的物品計有大木櫃、蚊帳、香薰、狗仔床、甚至背心睡衣，不過購物車依然空空如也。
有動靜，不過係喺手袋區，Emme被古怪手袋吸引，拿起一個報紙圖案的銀包：「好得呀！放最多錢嘅銀包，居然用最平嘅報紙去包！」嘩，搞乜？竟然去咗睇手袋？計時㗎！
專心沉默的Emme明顯已經對要設計的「戀愛床」心裏有數，專攻紅白色小飾品，玫瑰蠟燭、紙巾盒、紅絲巾相繼上車。隨即又直踩至床上用品部，以20秒78時間掃起白色羽絨被、枕頭跟紅色咕𠱸3個轉入最後直路！
進入示範單位部份，先後「劫」走櫈兩張、連非賣品大胸人形雕像甚至道具紅茶杯都不放過。最開心是看到一串紅色玻璃掛簾，這裏她花了１分鐘考慮要深紅還是鮮紅色。
動手時段
回到「床位」總部，開始動手設計，睇睇表，已經只剩下5分鐘時間！只見Emme快快手，鋪床擺枕頭需時……一分鐘！嘩，突然加速，拿拿臨除鞋踩床放掛簾，擺放床頭櫃飾物。
一切就緒？但見Emme左望右望，似乎略覺不足，想點？
突然走過隔壁示範單位，抓起道具士多啤梨往床上撒去，搞掂！還幫攝影師度鏡位，要拍到床尾兩張小紅櫈：「個畫面有啲層次感，靚啲！」果然細心，完工時間22分鐘，超時啲啲，算啦！
咁搞有理
問一問Emme點解要咁搞，佢話以前在外國鍾意色彩對比強烈的設計，不過回到香港反而喜歡白色等清一點的顏色及擺設，「因為香港地方太窄，太有壓迫感，反而要諗辦法平衡！」所以床的主色用白色，再用紅色襯托，有甜蜜感得嚟又唔會太搶。又睇睇圍觀的路人收唔收到？
究竟係乜累Emme浪費了兩分鐘？原來就係一堆古靈精怪的手袋——G.O.D的最新搞作，報紙、手套、軟尺都可以變手袋，咁奇特，難怪Emme都被吸引住。
由肉女到才女
雖然人人都話Emme骨架比較大，不過真人卻非常瘦，肥記者每次都對她的竹篙腿跟香雞臂望而生畏。但原來BBEmme曾獲「巨嬰」銜頭，媽媽常向她抱怨「生得你好苦」之餘，「太大件」的Emme還一直被護士誤認為是男仔，經常向她媽媽「你個仔你個仔」的叫，聽得媽媽啼笑皆非！
誰也猜不到，長大後的Emme竟然成了高瘦型女。問她最愛吃甚麼，她居然答我是牛扒！揚言一去餐廳吃飯就忍不住要點鐵板牛扒的她，對於港式牛扒，她卻一直有個疑問：「外國餐廳點牛扒要幾成熟都可以，點解香港餐廳只得5成、7成熟同全熟可以揀，而且只得單數？」
從Dior到Emme，黃伊汶好像「豐富」了許多，不單止是行性感，還有設計、繪畫等方面都找機會露兩手，開始有啲才女Feel。
她說在溫哥華念書時，已經試過花約$1,000，DIY將間150呎的房大修。她找來彩色牛皮膠紙、不同顏色的布「包」起全間房，書櫃、書枱都無一幸免變成彩色。「我好鍾意好Fashionable、好有壓迫感、層次感，那時候常常帶朋友回房欣賞！但就因此引起寄居家庭不滿。
跟一般愛藝術的人一樣，Emme由細畫畫畫到大，小學時逢兒童繪畫比賽必到，大大話話都攞過四、五次獎。不過長大後，意識到「室內設計比較好搵」這個道理，所以轉投室內設計，但閒時當然還是愛畫畫。她說自己最受畫家CrackClock影響。