最近香港忽然彈起好多「創作人」，由佢哋創作嘅潮流產品，除咗香港賣得之外，外地亦有唔少Fans，可謂名利雙收。好多後生仔都以佢哋為榜樣，買齊佢哋嘅作品，重貼埋佢哋嘅海報。父母亦唔反對啲仔女追捧「創作人」，起碼佢哋少啲緋聞，形象比較健康。不過據潮界金牌經紀人「魯祖忠」表示，其實喺香港做「創作人」都係表面風光，背後辛酸不為人知。佢口快快爆單料出嚟：「最近有個喺亞洲區好吃得開嘅『創作人』，諗住去美國親身宣傳佢自己嘅作品，已經聯絡好晒當地人士，臨埋門點知攞唔到簽證，搞到一鑊泡，最後只好轉而去啲唔使簽證嘅地方繼續佢嘅環球大計喇。攞唔到簽證並唔係因為個『創作人』唔識講英文或有案底，而係因為佢哋冇份正當職業，張銀行月結單唔夠牙力。當領事館嘅人問你做邊行嘅？唔通你答『我做創作』呀！聽講話就算佢Show晒自己成本電話簿咁厚嘅雜誌報紙訪問稿出嚟，都係搞唔掂。重有呀，做創作人去到銀行都經常被人恰，例如佢哋想做按揭或借貸，銀行都唔批，又係因為冇份正職照住，就算連申請信用卡都難啲。其實做『創作人』真係好慘㗎！」