星期一至五，山長水遠由南丫島搭船到中環再轉地鐵返工，放工後返到屋企兼舖頭，第一件事唔係沖涼食飯，而係開舖做生意；星期六、日放假，唔會約朋友去玩，唔會出市區行街買衫，仍然係留喺舖頭整餅、招呼客人，個個禮拜如是；辛苦？No！對正職係OL，最近喺南丫島開設了一間Cafe嘅Shelly嚟講，呢種生活絕對係享受，享受為達成夢想而努力的每一步。
記者：馬慶武 攝影：伍慶泉
Shelly嘅夢想係開一間屬於自己嘅Cafe，無咩浪漫嘅理由，背後亦無童話式嘅故事撐腰，只係全因由細到大都鍾意整蛋糕。日日要着套裝返寫字樓工作嘅Shelly，整蛋糕嘅經驗超過十年，「都唔係好記得幾時開始鍾意整蛋糕，食就鍾意咗好耐！第一次整蛋糕，好似係中五家政堂，之後就不斷睇書學做不同口味嘅蛋糕，愈做就愈鍾意，愈鍾意就愈做。」其實開呢間舖之前，Shelly已經喺一間同樣位於南丫島嘅服裝店門口借用一個角落擺檔，唔少客人試過都話好味，有咗信心，前排搵到合適地方，就決定自立門戶達成心願喇。
開得舖頭，梗係唔可以整嚟整去都係嗰幾味啦。Shelly自中學開始已經成日睇書兼上網搵資料，學整新口味，𠵱家識整嘅蛋糕都不下數十款，有啲重係自己研究改良而成，希望不斷推陳出新，「我本身都鍾意食蛋糕，所以都成日會幫襯出面啲餅店，試過有新嘅口味，咪自己估吓佢用咗咩材料，返嚟實驗吓改良吓，咁就可以創出新口味啦。」至於邊日整邊款蛋糕，Shelly就話全睇心情而定，不過每逢周末，Shelly都會整兩款不同口味嘅蛋糕，星期日更會整三款，照顧不同口味嘅客人。
每逢周末周日必備嘅Tiramisu，Shelly落足材料兼足心機製作。Tiramisu咬落鬆軟香甜，而且咖啡味及酒味非常濃郁。
甜味較淡卻充滿豆腐香味，而且餅底鬆化，食多件都唔覺漏，啱晒夏天食。
右：伯爵茶($18)
叫得Cafe，當然會供應藍山、Mocca等各種咖啡，另外重有不同味道果茶，好似冰凍嘅薄荷茶同伯爵茶，就最有清涼感覺。
精選TeaSet
每逢周六周日，Cafe除咗供應招牌Homemade蛋糕外，重會有不同TeaSet。呢款炒豆腐多士材料有豆腐、冬菇、香草及芫荽，Shelly話專為素食者而設，香口得嚟亦夠健康。
田園沙律用料製法都無乜特別，不過勝在蔬果新鮮，清新開胃。再配上香草蒜茸多士，當下午茶份量啱啱好。
除咗舖頭有蛋糕賣外，Shelly亦會接一啲訂做Order，客人可以選不同口味不同形狀之餘，重可以要求不同裝飾配料，想訂個獨一無二嘅蛋糕𠱁吓女朋友就最啱喇。而且Shelly更會親自送到地鐵沿線各站，因為Shelly喺尖沙嘴返工，所以如果係喺中環及尖沙嘴地鐵站交收，重唔使收額外費用㖭。
採訪當日，Shelly放工後專程搭船返屋企攞蛋糕，再出中環送外賣㖭，認真充滿誠意。
收費：$110-$140一磅（另加$30運送費）
店名：ShellyCakeExpress(南丫島榕樹灣大園村12B地下/94940755)
營業時間：星期一至五下午7時至10時半；星期六、日上午9時至晚上11時