經紀黃前日講過，市場傳聞創維數碼（751）搞配股，而前日晏晝亦出現大手成交，但公司則表示唔知成交量增加原因。
小初覺得奇怪，於是打電話去問經紀黃，佢話確係有位仁兄在Q記證券行要咗少少貨，噚日重喺1.04元沽咗。佢估計批貨並非來自大股東，所以公司先至話唔知。
講起工業股配股，噚日一連有兩隻工業股搞配股，就係毅力（332）同埋升岡國際（485）。經紀黃話，工業股批股事件陸續有來，早排升上2元水平嘅老牌工業股利民實業（229），雖然近兩日股價略見回軟，但有個行家講，有間證券行想搵生意，同公司傾緊搞配股。
有間歐資行近期幫唔少工業股搞批股，最近幫利民出咗個報告，唔排除想做埋人哋生意。
利民前兩年曾經有意分拆業務上市，但最終搞唔成。不過，現時工業股當炒，所以重新被市場留意亦好正常。
利民噚日跌3.3%，收2.20元，估計未完成批股前，股價會有一定支持。
慕容小初