呢排影壇吹得最勁嘅緋聞，莫過於主演《盜墓者羅拉》嘅安琪蓮娜祖莉（AngelinaJolie），喺加拿大搭上KylieMinogue個法裔靚仔男友奧利華馬天尼斯（OlivierMartinez）。雖然Kylie一路都話冇嘢，但係英國狗仔隊早兩日就影到佢黑口黑面喺倫敦希斯路機場出現，準備出發去加拿大蒙特利爾，慌唔係去昅實佢隻衰佬咩！
但係Kylie重同啲朋友講：「奧利華同安琪蓮娜係老朋友，又一齊拍緊《TakingLives》，佢哋之間其實冇嘢，我唔擔心。」我羅拉覺得佢急急腳飛去加拿大嘅舉動，已經出賣晒佢！
又好難怪Kylie咁緊張，佢已經三十五歲，梗係好想安定落嚟生兒育女，佢視奧利華為佢嘅終生伴侶，但係報紙啱啱登咗一輯奧利華、安琪蓮娜同養子麥度斯（Maddox）去睇棒球嘅相，奧利華同安琪蓮娜兩母子重玩得鬼咁開心，十足一家三口天倫樂，Kylie睇到啲相實火滾啦，加上奧利華個前女友美娜蘇雲露（MiraSorvino）個阿媽又加把口，話如果Kylie諗住要一段有承諾嘅感情，咁就一定搵錯人，你諗佢又點會唔震過貓王吖！