任關佩英喺港台開咪，可謂語不驚人死不休，真係真心直說，並無虛言，其實呢啲都係任關嘅真性情。八方早前同佢閒聊，發覺佢仍然好關心香港嘅一切。
喺任關眼中，「香港人永遠唔會太偏激，佢哋知道發生緊乜嘢事，有自己嘅睇法，整體嚟講好理性。」
佢話，就算對政府，香港人都唔算苛求，只要政府稍為聽吓佢哋嘅心聲，聽吓佢哋嘅訴求，佢哋就收貨。當然7.1之後，社會係有咗新嘅變化。
八方於是問呢位鐵蝴蝶，7.1嗰日人喺邊？點知佢話自己同啲朋友一連三日去咗順德江門打波，由6.30至7.2，咁即係冇去遊行？又話好關心香港。哦，原來佢係講舊年七月，當時佢剛離開政府，班老友怕佢放唔低，陪佢去打高球。至於今年7.1，佢就話上半部去咗愉景灣打高球，下半部係咪去咗遊行，佢就笑而不答，大家心照啦。
任關自從唔同老董玩之後，人都靚晒，所謂冇官一身輕，佢舊年去劍橋本來修讀美術史，點知後來迷上水彩畫，於是臨離開英國，就買晒啲畫具返嚟，重去港大學人體掃描，五十六歲人同啲十幾歲嘅小朋友一齊畫出彩虹，你話幾寫意。
「啲水彩嘅變化好大，顏色喺水裏面化開，效果永遠唔一樣，好新鮮。」可能就係呢啲變化，深深吸引住呢位為官三十年、做事永遠有板有眼、凡事小心翼翼嘅鐵蝴蝶。
傳真︰2623-9278
電