一直遲遲未見推出嘅新款福士Touareg車系，雖然上周四嘅傳媒發布會，因颱風襲港關係而被迫臨時取消，搞到響幾乎無大型宣傳下，上個周末正式跟香港車迷見面；惟亞Mark打聽得知，呢部Touareg銷情竟然節節上升，至今經已收到十多部定單㖭！咁又係呀！呢款全新福士嘅豪華SUV，講賣相絕對不遜於份屬姊妹車嘅保時捷Cayenne，至於底盤及懸掛組合，聽講我哋四眼編輯試過車後都讚不絕口，日常On-road既有穩妥重有出眾嘅循迹性，而遇上Off-road環境的話亦一樣無問題，至於一台3.2公升V6偈表現，亦大可媲美同級對手㖭！惟車價方面，標準版Touareg不過賣50萬左右，配備可調高低液氣壓避震嘅頂級版型號，都只係賣56萬上落，又難怪一班SUV迷會趨之若鶩啦！