據灣仔電腦城Summy所講，目前店舖銷售以砌機佔大多數，雖然邊際利潤唔及散件貨賺咁多，不過勝在一次過賣幾件，屬「密食當三番」之做法。今日就為大家搜括幾款近期熱門砌機硬件，全部以平靚正取勝，《蘋果》讀者去買重有蘋果價㖭！
記者、攝影：徐影龍
內置式IDEDVD燒碟機一路係咁跌價，近排終於突破一千蚊心理關口，賣$980。Memorex呢款DVD燒錄機跟名牌RICOH同一規格，有齊JustLink防燒死碟技術，最高速度達2.4×嘅DVD「+」燒錄，雖然並不支援「-」制式，不過以一千有找嘅賣價，相信引到唔少人入貨。
潮流雖然興RAID同SATA，不過暫時仍以傳統IDE硬碟為主，普遍賣價亦跌得厲害。IBM120GB（2MB）最近報價$800，比之前又跌多百幾蚊，算係相當抵玩。順帶一提係硬碟雖標明Hitachi，不過同屬IBM出品，買家唔好誤會舖頭畀錯你呀。
近期2.4GHzP4可謂當紅炸子雞，不論砌機或散賣都勁受歡迎。主因係有齊最新嘅HT技術及800MHz外頻，賣價又比高一級嘅2.6GHz平一大截，兩者速度相差無幾，不過就慳成幾百蚊，精明用家梗識得計數。
報價熱線：28938819
地址：灣仔電腦城249號舖