中國人傳統篤信風水命理，好多人買樓前，都要搵風水師睇過先至落實。港置噚日就搵嚟著名風水大師余中哲，講解何文田君頤峰嘅風水格局。
余大師話，君頤峰命名同個地形配合，先從「君」字講起，古字寫法有兩撇，同君頤峰各座嘅「八」字形擺位相似，中間個「口」字，就好似物業中間個泳池，正因為有個咁樣嘅地形，所以個盤就有「君皇之勢」，左右平衡加埋個泳池，重利財㖭。
另外，君頤峰兩棵名為「金枝」及「玉葉」嘅百年大樹，余大師話，風水上有助穩固根基，第一至三及九座單位，特別利文昌、考試及子女學業。
余大師來頭唔小，從事術數教學工作十幾年，曾接受各地報章同電視台訪問，重係好多大機構風水顧問。
以前樓市旺，經紀都會企喺業主嗰邊，𠵱家個市唔好，佢哋多轉軚幫買方㩒價。蘭西最近見到報章廣告，話觀塘瑞寧街嘅瑞寧樓（圖三），一個實用面積二百七十五方呎銀主盤放售，有代理建議買家還價十九萬。假如真係成到，造價應該係市區最平，呎價六百九十一蚊，都係同區最低。
另同區康寧道泰安樓，一個四百方呎連四百呎天台嘅單位，代理建議試價二十八萬，即係每呎七百蚊。
喺五月份觀塘美安大廈一個三百五十方呎單位，以二十五萬賣咗，呎價都要七百一十四蚊。
睇見呢啲價錢，係咪有時光倒流嘅感覺呢？
港島有個豪宅區叫Jardine'sLookout（渣甸山），遲吓九龍區都有一個叫Caldecott'sLookout，呢個名係由嘉華地產創嘅，聽講由港島Jardine'sLookout而得到靈感。為令更多市民認識呢區，會加強宣傳，做美化環境同街道嘅工作。
嘉華咁做其實都係為咗郝德傑道3號豪宅盤。由於隔籬信和都有兩個地盤發展緊，所以嘉華搞呢個Caldecott'sLookout，聽講都有將信和嘅盤包括在內，唔知美化嘅費用係咪兩份承擔呢？
九鐵主席田北辰早前話，放棄九鐵鐵路沿線上蓋發展項目，所講嘅應該只係馬鞍山鐵路嘅上蓋發展，東鐵同輕鐵站上蓋發展權，原來仍屬於佢哋㗎，只不過𠵱家擺喺九鐵長遠發展計劃裏面。
東鐵沿線已批咗嘅，有火炭站同惠康倉合作發展項目，未獲批嘅有大埔墟火車站上蓋發展，另輕鐵沿線有天水圍輕鐵站，同洪水橋上蓋物業，四個項目如果順利嘅話，閒閒地都提供到五六千個單位。嘅然係長遠項目，應該三五年內都唔會有乜眉目，就算係，最快都只係天水圍嗰個較成熟，可以三年內出籠。
兩大龍頭地產商長實同新地，無論係賣樓或者電訊業務，都鬥得難分難解，各不相讓下，自然令市場更加熱鬧多話題。今次賣長沙灣宇晴軒佢哋又再碰頭，不過唔係打對台，而係繼青衣灝景灣同天水圍慧景軒之後再度攜手合作，長實郭子威重形容，今次係「鈦合金組合」，即係最硬嘅金屬，夠晒堅。
郭子威重話，長實同新地都各有Fans，之前睇唔啱天水圍嘅合作項目，市區一樣有兩大品牌嘅製成品。
兩間公司嘅合作，令蘭西深深感受到，呢個世界無永遠敵人。
蘭西
電郵地址：
