郭富城同梁漢文（梁炳）前晚喺南華會同商台DJ比賽桌球，結果以四比一大勝DJ隊，非常犀利！
梁炳同城城都熱愛打桌球，原來佢哋先後同奪得英國超級桌球聯賽冠軍嘅香港桌球好手傅家俊較量過球技。
問到梁炳點樣認識傅家俊，佢就話：「有次我同安仔一齊出席活動，我哋喺男廁撞見傅家俊，於是就走去問佢攞咗個聯絡電話，跟住就約佢出嚟打波。安仔猛推我去同佢篤，打咗唔夠三Q就淪為執波，佢重表演花式畀我哋睇。」
梁炳重話有段時間冇唱片推出，佢試過一日花六、七個鐘去打波，佢話：「後來我明白咁樣花時間唔係辦法，我寧願花時間去練琴。」
城城都話同傅家俊打過波，但平時就多數同好友沈嘉偉同張智霖打，佢話：「打桌球可以訓練耐性，同賽車唔同。」而城城前晚都有接受有線娛樂新聞台嘅訪問，不過當時嘅工作人員就遞咗個冇咪牌嘅咪畀佢。
組合Twins日前拍攝新歌《夏日狂嘩》MV，導演專登搵咗部過百萬嘅名車做道具，成員蔡卓妍（阿Sa）同鍾欣桐（阿嬌）為避免整花部靚車，原本只係坐喺車裏面拍攝，但當車主知道主角係阿Sa同阿嬌後，就示意佢哋可以任坐，就算坐車頂佢都唔會介意咁話。
台灣三人女子組合S.H.E嘅Ella噚日出外景時，發生意外入院。話說由S.H.E主持嘅《快樂星期天》噚日去咗間防災科學館，體驗消防員嘅工作。Ella示範由三樓跳落氣墊，點知姿勢唔正確，搞到第一節腰椎骨折，事後Hebe同Selina話Ella冇大礙，fans可以放心啦！
黃凱芹同王馨平噚日喺將軍澳出席節目《8號綜藝館》嘅開鏡拜神，問黃凱芹有關無綫收緊合約藝員對外接受訪問嘅規條，佢話：「我向來都係似遊客身份，多過似歌手，所以唔會太着緊。我會聽公司安排同跟大隊，如果做錯咗TVB搵我算帳，我就會知錯，咁冇理由人哋搵我傾偈我唔睬人㗎。」
