中海油（883）噚日大發神威勁升9%，成交高達5.07億元。市場主要憧憬公司發現重大氣田兼可能派特別股息，加上唔少外資行調高其盈利預測同投資評級，結果引來唔少資金追捧，而且重帶挈埋中石油（857）大升5.7%，成交增至4.25億元。
午後中銀香港（2388）發難，急升4.4%，重上8元水平，收8.30元，成交增至4.82億元。中銀好耐都未見過旺場，唔通中央已欽點在香港充當離岸人民幣結算中心？事實上，如果佢都無份做，重有邊間可以做呢？其他中資銀行表現亦不俗，工銀亞洲（349）更升逾10%。
重磅中資股同銀行股炒上，下一浪唔知會否再炒地產股？前日田北辰話交出九鐵物業發展權，跟住田北俊話港府好快公布新嘅樓市政策。黑客話，如果唔追落後嘅地產股，點對得自己住。不過，地鐵（066）有貨就要小心啲，此股噚日逆市下跌1.55%，收報9.55元。希望地鐵最多只係冇咗塊地，唔會俾董建華政府搞到成為一堆廢鐵啦。
前日停牌嘅升岡國際（485），據聞以先舊後新配售3億股，每股0.22元，折讓逾10%，集資6600萬元，主要用作興建新廠房之用。據聞市場反應不俗，今日應該可以復牌，由於有基金捧場，相信股價唔會大散，但就要小心有人玩震倉。
港交所行政總裁周文耀下周北上，阿董話過中央會支持國內合資格企業來港上市，或者周文耀北上後會有好嘢公布都唔定。
阿虎