7.1大遊行後，世界真係唔同咗，連廣播處前處長張敏儀張大姐噚日都突然開咪，喺港台第三台《Viewpoint》節目上講古仔。
大姐話《給香港的信》始於八十年代，八八年劉慧卿一封信惹怒港府，當時嘅布政司即刻打電話質問佢，「點解畀咁多時間反對派鬧政府？」大姐氣定神閒咁話：「係官員自己唔用啲時間啫！」
原來當時高官都唔願做呢個節目，節目變相成為所謂反對派輿論陣地，之後港督尤德答應開始每周讀一封信，肥彭上場後不久，亦於九五年開始每周一信，由於佢不時喺節目中爆料，令呢個節目受到重視，而港台為平衡唔同政治觀點，搵三大黨黨魁輪流上節目，𠵱家節目更多元化，基本上大部份政治人物都上過呢個節目。
大姐不厭其煩講歷史，係因為早前有專欄作家質疑《給香港的信》存在價值，大姐重話港台多次搵老董開咪，可惜佢老人家冇反應，佢話可能係時候港台再請老董嘞。
（圖）張敏儀開咪細說港台節目《給香港的信》嘅歷史。
傳真︰2623-9278
電郵︰