記得熱刺上屆英超一直受到傷兵困擾，諗住今個夏天會好運一啲，點知唔係，上季因傷唞咗半年嘅德國球員薛基，因為大腿舊患復發，又要長唞，聽聞重要坐輪椅㖭。
記得上年尾薛基對完查爾頓受傷後，大腿腫到豬蹄咁，大咗兩倍，見者心寒，差啲因為呢個傷而收山；好在季尾佢重可以踢番一場波，點知最近個傷又嚟料，重要再做手術。
佢自己都好失望咁話：「我啲腿肌硬到好似嚿木咁，醫生都擰晒頭，過去六個月我真係好失落，𠵱家又試係咁，令之前所做嘅嘢都白費晒。」佢𠵱家要用柺杖行路，坐輪椅都要老婆幫手，可想而知，真係好似殘廢人一樣，慘情！
熱刺真係唔知係咪地運唔好，近年都受到好多傷兵困擾，或者領隊荷杜真係要拜吓神至得囉。
碧咸喺球壇呼風喚雨，佢個妹祖安妮亦唔輸蝕。話說祖安妮原本同韋斯咸嘅迪科拍拖，早前兩人傳出分手無幾耐，祖安妮就俾人見到搭上葉士域治嘅賓特！迪科同賓特都係英格蘭廿一歲以下國腳前鋒，同樣都係黑人，來季重一齊喺英甲搵食，將來場上對碰有戲睇囉！
足總搞利物浦連埋戲金同門票抽佣就執超過三百萬粒，至於落場搏命嘅球員加埋出場費、入選費等都唔過五千蚊。雖然場波港隊輸咗，但我求大俠覺得既然足總賺到錢，攞多幾萬出嚟鼓勵球員，等佢哋更加積極備戰皇馬都好嘛，衰在足總同港隊高層唔識做，完全冇表示，真係唔得醒目！
國際米蘭終於都免費放走干斯卡奧，我求大俠好奇怪，干斯卡奧都重係當打之齡，上季都重係球會正選，唔通多咗新加盟嘅雲達美迪及盧斯安奴後，真係再容唔落干斯卡奧？最慘國際米蘭呢個時候至放人，好多球隊都開晒操，睇嚟干斯卡奧想繼續埋勁旅班嘅機會都唔係咁樂觀！
咩叫「大支嘢」？睇吓馬卡爾你就知！話說踢緊拉科魯尼亞嘅馬卡爾，正準備轉會拜仁，但係遲遲未成事。到日前拉科開操，佢竟然決定唔跟操，驚死隊友踢傷佢，又或者畀教練艾路列達耍佢喎！嘿嘿，如果真係轉唔成會，你估佢來季喺拉科重有冇正選踢呢？