一年一度的香港書展昨天在會議展覽中心開鑼，杜汶澤和謝霆鋒在不同時段舉行簽名會，但杜汶澤的簽名會獲最多支持者，本派二百個籌，最後簽了六百個。霆鋒則只獲七十人排隊輪候，場面差天共地。
今屆書展昨日在灣仔會展開鑼，謝霆鋒和杜汶澤昨天於大會安排下，分別在不同時段舉行簽名會，但首次推出作品《江湖血淚史》的阿澤，人氣卻勝過為其寫真集舉行簽名會的霆鋒。
現場所見，霆鋒的簽名會有近七十人排隊輪候，圍觀者約二十多人，霆鋒的經理人霍紋希則稱昨天派出二百個籌。而穿上劉德華送贈的黑色唐裝褸到場的阿澤則說：「本來派咗二百個籌，但實在唔夠，最後簽咗六百個。」其後當阿澤到攤位視察銷售情況時，數十名小妹妹從後奔跑跟隨，有些還把他團團圍着要求簽名和影相，引起一陣騷動。
阿澤得知其支持者比霆鋒為多時，他即揶揄說：「我揸車慢嘛！因為佢揸車快，早嚟啩！」當記者更正霆鋒已被停牌時，他又說：「市民就安全啲喇！佢係歌星可以有好多渠道，而我哋演員就少咗呢啲機會搞簽名會。兜乜吖兜，多過佢就多過佢啦！哈哈！」他還表示稍後會到十四間書店搞巡迴簽名會。
對於下月八日為女友王菲的生日，問霆鋒會否與她慶祝及買了禮物沒有時，他即笑得甜絲絲說：「唔答你！我嗰日好似有嘢要做，不過時間係人做出嚟嘅！」
但適逢當日是霆鋒契姊梅艷芳熱捧的球隊皇家馬德里來港作賽，問霆鋒會否陪梅姐看球賽，他說：「未知！但班朋友都有提起過。」
此外，章小蕙昨天亦在書展中出現，問她剛與外籍男友分手，心情如何時，她說：「唉！𠵱家七國咁亂，我又要將之前啲衫散貨，又要準備八月出兩本新書，所以好忙，連畀自己時間都冇。」
章小蕙續說：「我同佢拍咗七個月拖，都經歷咗好多課程，𠵱家當暑假唞一唞。其實之前已經同佢有摩擦，又想抽多啲時間陪佢，但又想出書，最終選擇咗遲啲出書，但我冇後悔。我係個作家，有咁多upsanddowns先有靈感寫作。」
採訪：陳梅香、王連連
攝影：陳慧安
