天氣好得很，尤其是當太陽直曬着東看台，而我則坐在西看台，坐在陰涼處看着接近二萬人在乾曬，心情很愉快。全場滿瀉足四萬人有多，小朋友們少見咁嘅大場面，基本上玩人浪時開心過睇波。
座位頗貼近草地，上半場利物浦進攻時，名牌球員經常跑過面前，「奧雲！」「狄奧夫！」「謝拉特！」雖用唔鹹唔淡英文大嗌，但奧雲的中文及英文發音其實一樣，終於在掟界外球時聽到我哋嗌，回眸一笑，百媚千嬌，已值回一半票價。
上半場是天國，下半場是地獄，因為利物浦改攻另一邊半場，我們面前的半場人口密度重低過喜馬拉雅山，只有利物浦龍門在行嚟行去，波都冇機會掂吓，悶到幾乎攞本小說出嚟睇。冇波睇於是睇球迷，超過一半係後生年青人，其中又約有三成係後生佳麗，相貌娟好兼tubetop短褲，環境比周末的蘭桂坊更優美，靚仔球員令一批又一批的少艾成為球迷，我愛球員，更愛球迷。
面前球場冇乜人，但經常聽到兩隊球隊要求換人，利物浦換人就話係畀多啲明星出場，但港聯換人則為試陣。人哋咁勁，港聯就算有晒默契、搏盡老命都唔夠人哋踢，重要係咁換人，似十足禮拜日約埋踢場波咁，試陣我明，但冇理由收我五嚿水睇你哋試陣……
（下周一續）