鄭裕玲（嘟嘟）的口才和演技均出色，原來是拜小時候母親經常帶她看西片早場，以及聽麗的呼聲所賜。嘟嘟的父母在其七歲時離婚，正因為這個童年陰影，令她對婚姻欠缺信心，打算不結婚。
鄭裕玲對於母親早前猝逝，感到很傷心。她表示母親的離開，以及跟男友呂方的交往，令她人生觀改變不少，變得不再執着。
嘟嘟只有一名弟弟，兩姊弟自幼感情很好，她日前說：「我哋成家人自細就住喺尖沙嘴區，我哋兩個都係讀上午班，放學一做完功課，我就帶住細佬去公園打韆鞦同玩滑梯，兩個玩到好開心就返屋企。夏天時，天氣好熱，我哋重去公園水池浸腳，貪佢夠涼爽。」
屈指一算，嘟嘟加入演藝界已二十八年，演技和口才早獲認同。嘟嘟估計是自幼母親帶她看電影早場所致，她說：「媽咪除咗鍾意帶我去戲院睇西片早場外，我好細個時屋企又校咗麗的呼聲，唔知係咪呢個原因，我對演戲好有興趣。其實到𠵱家，我仍然好鍾意睇戲，無論係好電影定係劣評如潮嘅電影，我都會去睇吓演員演成點。」
嘟嘟七歲時，爸爸和媽媽因性格不合而離婚，她說：「我細個喺屋企見到阿爸阿媽嗌交，之後佢哋就離咗婚，我都好接受佢哋嘅決定，或者係因為父母離婚嘅童年陰影，我𠵱家都決定唔會結婚。」
採訪：比華利
