金庸噚日大罵董建華，話時話，要董建華好似金庸筆下嘅英雄豪傑咁又真係幾難，楊過、黃蓉、小龍女，個個都好到冇人有，點比呀？連金庸自己都話高攀唔起小說中嘅女主角啦。
查大俠接受有線張寶華訪問時，寶娃娃問佢最想揀小說中邊個女主角做老婆或者女友，佢話最欣賞黃蓉同香香公主，但係做老婆就嫌自己配唔上人哋，做女友又嫌人哋對太架勢，做佢哋男友壓力大，而且現實中亦唔會有好似黃蓉咁聰明嘅人。
金庸噚日重邀請咗專程來港採訪書展嘅台灣記者上佢間無敵海景辦公室訪問。大家傾到台灣拍攝嘅小說改編電視劇，搞到金庸把幾火。事緣楊佩佩製作過一齣由任賢齊、吳倩蓮任男女主角嘅《神鵰俠侶》，劇集中小龍女竟然同姦污佢嘅尹志平做好朋友。查良鏞話：「一塌胡塗，令人看了生氣！」
最近，台灣張紀中又準備拍《神鵰俠侶》，有傳考慮搵謝霆鋒同章子怡任男女主角。金庸好激動：「我反對，謝霆鋒不可以做楊過！他一時又王菲、一時又其他人，完全不像專一的楊過。如果由他演楊過，我一定不賣版權。」記者問，章子怡做小龍女又如何？金庸話：「她好像胖了一點。」章子怡都肥？
（圖）查大俠話自己配唔起佢小說中嘅女主角。
傳真︰2623-9278
電郵︰