德國寶馬車廠近年可謂狀態大勇，先後推出多款新車（如新5系、7系及Z4開篷跑車等等），全都不約而同成為車迷嘅追捧對象；然而，響九月舉行嘅法蘭克福車展上，寶馬汽車將會展出經過略作改動嘅X5新車，並預計會於今年底或明年初正式登場。
其中新車嘅最大改動，就係廠方會為其配用一台附有Valvetronic技術嘅4.4公升V8引擎，馬力輸出高達320匹，較現有型號多出34匹外，響一套同屬全新配搭嘅6前速自動波箱輔助下，0至100公里加速度僅為7.0秒（現有型號為7.5秒），而極速更較舊有型號嘅220km/h多出10km/h，達230km/h，從而令新車性能表現更上一層樓呢！同時，廠方亦為新車裝配一套全新嘅xDrive四驅系統，此系統能更有效控制四輪動力分布，確保無論係On-road抑或係Off-road都可有出色行車表現。
造型設計亦有些許改動，如用上全新霧燈、頭冚及生風入口組合，就連尾泵把等配搭亦用上新設計，從而令車子造型變得更具吸引力；各位有興趣嘅車迷，不妨拭目以待喇！