早兩個月前已有傳聞Palm會推出Tungsten後繼機種T2，互聯網亦逐漸流出T2的照片，從照片上可見T2用上新的顯示器，亮麗程度令人相當期待。直至上星期PalmInc.終於正式宣布推出TungstenT2，顯示器比第一代相比的確進步不少，再加上32MB記憶體及新版本OS5.2.1，相信令唔少用緊TungstenT的用家都會心動。
記者：劉耀祥
攝影：陳陶鈞
ImageGirl：Silvia
外形與前作TungstenT（簡稱TT）一模一樣的TungstenT2，同樣採用伸縮式機身，體積有絕對的優勢，行政人員使用都相當方便，放入衫袋都唔覺重。有傳聞Tungsten3同樣採用此設計，看來PalmInc.在PalmV的纖薄機身後終於找到新一代經典外形。TT與T2雖然外形相同，不過想要分辨卻一點都不難，皆因T2以銀色主打，與TT的炭黑色有頗大分別，一眼就睇得出，未知Palm會否像SONY般為T2推出炭黑色特別版？
除機身顏色不同外，T2用上與Zire71一樣的TFT顯示器，比TT的反射式TFT更為光亮，顯示照片時，不論細微位及背景色都沒有出現偏色現象，尤其背景比以往機種更為「白淨」，睇相時的膚色及頭髮都更為細膩，在日光或室內都可以清楚閱讀，與SONY的Clie系列顯示器不相伯仲。雖然質素大躍進，不過T2的顯示器解像度仍然維持在320×320，並未為新機裝上虛擬手寫區，相信令不少電影迷及電子書迷失望。具備Graffiti2新輸入系統，毋須學習Graffiti，新用家更易上手。
T2採用PalmOS5.2.1之餘，亦將記憶體增至32MB，「實用面積」有29.7MB，雖然未夠TungstenC的64MB多，不過T2對象乃行政人員，都足夠使用，安裝完中文系統仍然有大量空間，配搭OMAP144MHz處理器，開啟軟件綽綽有餘，播放Kinoma等電影檔並未有礙窒情況出現。繼Zire71之後，T2亦同樣裝有《Photos》程式，用家毋須再為睇相軟件頻撲，不過未能直接開啟記憶卡相片就稍為不足。Tungsten獨家強項藍芽當然亦唔少得，隨機光碟中同樣附有《BlueChat》及《BlueBoard》兩個藍芽程式，上堂開會就算同另一部藍芽Palm傾偈都絕對冇人知。
作業系統：PalmOS5.2.1
處理器：OMAP1510144MHz
記憶體：32MBRam
顯示器：320×320解像度/65,000色TFT
擴充槽：SD/SDIO
功能：藍芽、MP3
體積：102×122×75mm
重量：157g
查詢：800903253
$3,180