大概冇乜人估唔中，港股急升，幾乎收復晒上周全周失地。升得最勁嘅藍籌，未輪到滙豐（005）。滙豐只係升1.50元，收95.75元，升幅1.6%，略輸畀恒指（升2%），但最威水窩輪，則係滙豐Call輪9631。
9631收30仙，升85%，唔係乾升，有39球易手，銀両都成1千萬，亦有數據支撐。隻輪下星期夠鐘，溢價0.1%，槓桿率31.9倍。
滙豐Call輪9763由59仙彈上71仙收市，升20.3%，9月到期，負溢價0.7%，槓桿率13.5倍。
滙豐Call輪9632收70仙，升幅14.8%，細一啲，未跟貼正股，又係9月到期，負溢價0.8%，槓桿率有13.7倍。大成交嘅滙豐Call輪中，呢件最抵。滙豐現價95.75元，距上月頂位97.50元差唔多，話破就破，試衝紅衫魚價錢，滙豐見齊頭價，9632理論價係1.20元。
華創（291）收7.05元，升20仙，分拆嘅華潤水泥（712），今日以介紹方式掛牌。只有華創小股東獲分配，街上冇乜貨，相信唔會丟架，華創升定先。
華創昨日成交幾乎有10球，幾乎大增1倍，個勢重去緊，執啲Call輪有着數。冇得揀，得隻9270，下月中到期，輪價6.5仙，靚在溢價唔夠0.9%，而槓桿率則有10.8倍，好爆炸。
章盛