時間過得真快，梁錦松以前嘅左右手已先後調走，譚志源上周五正式離開財司辦公室，林國強已到位接手做財司政務助理，至於新任新聞秘書羅志康噚日亦已正式上班。
所謂萬事俱備，獨欠新財司。羅志康同八方話，佢都希望快啲有新老細，因為呢個位好重要，唔可能太長時間懸空，而且新一個財政年度嘅諮詢工作快要展開。羅志康又笑說，自己星期日先從日本返港，同譚志源嘅交接工作都要喺電話進行。
人人都等緊個新財司出現，但係又愈嚟愈多人表態話唔制，噚日連嶺南大學校長陳坤耀都話佢個人意願係唔想做，何況至今都冇人搵過佢，佢亦唔相信會有人搵佢，佢老哥講完呢三句嘢就轉身走咗。當然正如羅志康講，葉澍堃𠵱家做緊代財爺，香江唔係冇掌櫃。
傳真︰2623-9278
電郵︰