找At17吹水跟講音樂感覺很不同。前者天花龍鳳瘋瘋癲癲嘈到拆天，後者認真專業有見地有品味且有料到。剛跟千嬅合作完《龍爭虎鬥》，9月將於《原音2003樂隊比賽》決賽中擔任嘉賓的她們，平時最愛竄上通利琴行試結他，一次閒閒哋玩個幾兩個鐘，留低不少指模。
記者：陳慧敏
攝影：陳細權
Hair：DericNg（Chin-G）
Location：通利琴行（尖沙嘴總行27239932）
哥哥明明錫細妹，但總要扮型兇你一兇。10歲時Eman（林二汶）的哥哥一峰給她留下一張紙及曲譜，叫她自己睇自己練，有問題才去問他。「其實我阿哥不是太有耐性教我，問他的時候他會『咩呀？咪咁樣囉！（扮個想兜巴車埋去嘅惡樣）』，我算是於『暴風』下成長的！（爆笑！）」怪不得Eman也練得一手暴風指法，下下雄渾有勁，真的要多謝阿哥！
Ellen（盧海彤）9歲時玩爸爸的舊結他，12歲去旺角的「噏dup」琴行學藝，「一個老師對20個學生，很搵笨！不過都持續了半年。」12歲，被搵笨，正常！但後來認識了Tomy，一個在圍內人間頗有盛名的結他高手，Ellen終於遇到良師，現在結他已成了她的最拿手樂器，想再在這方面搵她笨？NoWay！
《原音2003》決賽於9月28日（日）7:30pm舉行，３年前二人就是在同一個比賽中認識。可到
我的至愛
心水品牌：Taylor
試音曲：《AKaseOfYou》
Eman鍾情Classic款12弦木結他，音質一定要夠澎湃。一見到TaylorGSGW，「係你喇！」就拿下來「澎湃」的彈了一段！不過在她心目中，最好的仍是6年前買的一支低質素YAMAHA。「近兩年開咗聲，音質非常SOFT，有時我錄音都會用它呢！」
心水品牌：Gullb及Taylor
試音曲：Satellite一類
選結他，Ellen特別鍾情Gullb及Taylor兩個結他牌子：「每一支都幾乎係一份糧呀！不過又真係一分錢一分貨嘅，無論音色同手感都比較好。」除了抱起來不「頂心頂肺」外，音質方面就全憑個人感覺，想彈不同的音樂，要求的結他音質也不同，所以Ellen擁有8支結他。其中一支就是她9歲時用的，爸爸的舊結他。
夢想之選
「呀~搵到喇！好靚呀！真係好靚呀~~！」攬住支FenderJaguar10/0800/805，Ellen口水直流，手指由結他頭摸到結他尾，誰知下一句卻是「我鍾意佢靚咋！我未學識彈㗎！」渴望得到的，是靚靚FenderJaguar；打算買的，則是用來製造其他音效的GuitarEffects，「我已經有好多個結他了，所以比較需要買個Effects，玩玩音效。」
呢個時候，原來Eman已經一馬當先跑了去玩她最愛的鼓。「如果可以買齊一套Conga（非洲鼓）就好喇！我跟阿哥彈了多年結他，近年發現自己的性格跟音感打起Conga來更適合。用手敲下去的感覺，震啲，好Feel啲嘛！」然而屋企空間不夠，公司就更加窄，根本塞不下這麼一大套鼓，於是連兒童用鼓都不放過，先搬回家頂癮。
吹水音樂以外
At17於《原音2000樂隊比賽》認識，當時Eman19歲、Ellen14歲，2003，At17擔任同一活動的嘉賓，算是有點名氣。放下了樂器，收斂了才華，兩個女孩最愛在茶餐廳打躉吹水，和你我一樣，平平凡凡。
除了湧上通利試結他外，二人最愛就是到茶餐廳吹水、逛街，然後再找家茶餐廳繼續吹。Eman鍾情茶餐廳，因為它一來夠平、二來可以坐好耐。「只要你坐了進卡位，就不會有人來打擾你！」講開茶餐廳，氣氛再度炒熱，話題就轉到土瓜灣白宮茶餐廳的重料回鍋肉通粉！「佢畀整整一罐回鍋肉你㗎！」
兩個吹水友原來各司其職，通常Eman負責講，Ellen負責聽。不幸的是，Ellen經常鼻塞，「換氣系統」經常失控，Eman又成日忽發奇想引Ellen發笑。Ellen：「佢係癲㗎！癲㗎！試過有次我笑到透唔到氣蹲在地上，Eman反而落井下石繼續引我笑，差點窒息死！」Eman：「還好，香港人夠冷漠，雖然有人望，但都冇人過來慰問，佢咪繼續『來回地獄又折返』囉！」