標榜九龍市區頂級豪宅嘅何文田君頤峰，論地段級數，確係位於九龍傳統豪宅區，而且又係屋苑式檔次，唔少富豪級準買家，都想睇吓個盤有幾豪氣。
呢個由五家發展商精心興建嘅豪宅，聞說早前率先去參觀過嘅信和主席黃志祥都有興趣，聽聞佢對第3座頂樓B室複式單位情有獨鍾。
不過，黃生持有好多靚物業，呢個會留嚟自住、投資定係招呼朋友呢？呢類複式特別命名為「君頤天堡」，成個盤得22個，咁尊貴，又難怪佢會心動。
負責今次銷售嘅新世界，為隆而重之推介呢個盤，所有售樓員工，男要打煲呔，女打領呔，全部都係紫色底色，印有新世界Logo，係特登為呢個盤而做。點解要用紫色，聽聞係何太指定，因為紫色夠高貴喎。
利嘉閣大圍分行高級經理何汝珊話，上個禮拜日佢哋總共做到六宗買賣同三宗租務，單日佣金有成十幾萬，係近半年以嚟最多嘅一日。
佢覺得最特別一宗買賣，係金禧花園一個六百三十八方呎，連二十呎平台嘅空中花園單位，成交價一百三十五萬，呎價二千一百一十六蚊，高其他四百幾呎單位造價近一成八。
呢類單位成個屋苑只得十二個，今次重係九七年以嚟首宗成交，聽講因為業主要換樓至肯放售。
中原測量師行董事總經理黎堅輝講，佢哋喺北京新成立中原中國專業顧問公司，主要分企業服務投資部同設計部。其中設計部剛請咗名新加坡園林設計師加盟，以迎合內地追求國外名牌嘅訴求。
點解唔請歐美設計師呢？黎堅輝解釋，歐美嘅設計意念，唔係咁啱內地人士嘅feel，東南亞設計反為合脾胃。佢打個比喻，內地人就算鍾意食漢堡包，都唔會一日三餐，點都係以米飯做主糧嘅。佢重話個結論係啲發展商研究過，總結出嚟㗎，夠晒有參考作用。
至於揀北京做試點，係因為北京正逐步開放，較易接受新概念。公司預計有十二人，部份係中原中國調過去嘅。
商場一旦流失顧客，好難翻身。大業主要搞旺個場，真係乜嘢招數都要出齊。
蘭西聽聞有大業主見個場有啲空置，就想盡辦法搵租客進駐，以有得賺至畀租招徠，等個場唔使冷冷清清，唔係連剩番嘅租客都嚇走埋，個場就有排都醫唔番。呢個大業主係邊個？聽聞係華資發展商。
加盟新地屬下康業服務有限公司，任職董事總經理兩年嘅鄺正煒，最多人熟悉應該係首創為樓盤作歌。不過，佢喺帶領公司發展方面其實都有一手，就係唔止要做到「想顧客之所想」，重要做到「先顧客之所想」。
佢有咁嘅想法，同之前喺屋宇署任職，喺教會擔任執事同主日學導師多年，經常接觸唔同階層嘅人有關。
另外，以前康業用「分區評比」嚟選出表現良好嘅隊伍，但鄺正煒就改為選舉傑出員工，由「人」出發，提高員工服務質素。想獲選嘅員工就要努力啲嘞。
蘭西
電郵地址：
