昨日大市大升，連帶經紀黃推介嘅創維數碼（751）亦勁升，終於衝破1元阻力位，最高見過1.06元，最後收1.04元，升9.48%。
經紀黃話，由於創維個勢太靚，所以順便喺噚日搞埋批股，晏晝有一手每股1元，數量高達50球嘅大手成交，好似就係批股上板嗰手貨，市場傳聞話接貨嘅芬佬又係金手指。
如果係真嘅話，創維股價真係分分鐘重有得去，皆因金手指本來揸咗唔少貨，家陣重要加碼，如果唔係超級睇好，就唔會咁做。
另外，甚少品題創業板股同新股嘅經紀黃，噚日同小初推介家陣招緊股嘅環球數碼（8271），確係令小初奇怪。呢間公司嘅老闆係前證監會主席，喺大陸人面夠，聽講隻股有大陸資金照住，因此唔少行家都要貨。
環球數碼今次以每股1元，發售6630萬股新股，集資淨額約為5330萬元，規模話大唔大，話細唔細，但至於上市後有冇得炒就好難講，小初就覺得炒作藉口好似唔多夠。
慕容小初