經過兩個星期惶恐不安的日子，兩個女孩漸漸發現不可再坐以待斃，於是，擁有五年工作經驗的Racheal索性自己寫履歷「通街派」。「我都有睇報紙，Sende-mai1去見工，但多數都石沉大海。諗諗吓咪拎住份履歷逐間逐間咖啡室、便利店派囉，最後真係得咗喎。」Racheal第一份工作是在一間果汁店榨果汁，看似很容易，卻幾乎將她打沉。「以前做過導遊帶鬼佬，以為自己英文好掂，點知喺呢度我根本聽唔明澳洲英文……」除練英文外，Racheal還假裝懂得沖咖啡，果然又有間咖啡店聘用了她。「其實我唔識㗎，咪話以前做嗰間唔同呢間，叫佢哋再教我囉！」
相對於Racheal，Amanda的路就顯得較崎嶇。「搵咗三個禮拜先搵到一份在馬場賣冬甩的工作……不過只得一日。但呢一日俾我知道原來讀咗三年大學嘅英文都係好差，連冬甩味都唔識點講，好驚青。但咁大個女第一次見識咁大場面，睇見啲淑女真係帶晒騎呢帽，好過癮又開心，呢種經驗喺香港永遠都冇得試。」一天工作以後，Amanda又得再尋尋覓覓很久才找到其他工作，但很多都做了不久便被炒魷了。「冇所謂啦，𠵱家習慣咗已經好好多。當初我知道要成日轉工，咪安慰自己當作一種考驗囉。」對，一生人又有多少機會可以往外闖？難得年輕，甚麼挫折都是磨練自己的好機會。
（悉尼Twins四之二）
記者：李莉
攝影：陳智良