傅珮嘉自小遺傳了母親的音樂天份，四歲時已開始學琴，由於唱得彈得，所以小時候已唱廣告歌及為卡通片配音賺錢，平均每月賺千多元，而她媽媽就會為女兒將酬勞儲起，作為日後書簿費之用。
傅珮嘉的父親以前在無綫任職動畫部，母親則是歌唱老師，所以她遺傳了雙親所長，從小已喜歡繪畫及具音樂天份，她在四歲那年，母親已安排她學彈琴及跳芭蕾舞，到十五歲時，她更已取得十級鋼琴的資格。
不過，當年傅珮嘉卻很討厭母親迫她學琴，日前她在電話中說：「嗰時屋企對我要求好嚴，每日都要我練琴兩個鐘頭以上，一練得唔乖就藤條炆豬肉，媽咪咁迫我練，我好唔鍾意㗎，覺得點解啲細路仔個個有得去玩，而我就冇，好憎㗎，但到自己大啲嘅時候，先知媽咪嘅好意，如果唔係學彈琴嘅話，我就唔會去學寫歌啦。」
傅珮嘉深具音樂表演細胞，故她四歲開始，已靠把口搵食，她說：「因為媽咪教唱歌嘅關係，識好多人，所以我好細個就識賺錢，唱兒歌、唱廣告歌、做配音，以前我重同迪士尼亞洲版嘅卡通片《小飛俠》配音同唱歌，我做小飛俠個女朋友Wendy，嗰時幾好搵㗎，唱一隻廣告歌都有幾千蚊，我每個月平均都賺千幾蚊。」而傅媽媽就會為女兒將酬勞儲起，作為書簿費之用。
傅珮嘉形容自己的童年頗為幸福，父母對她十分疼錫，而她唯一的兄長因比她年長十一年，所以她從小已視哥哥為長輩，她說：「以前阿哥講嘢，我成日唔知佢講乜，我又覺得佢唔體諒我，但大個咗之後，大家反而好好傾，乜都講嘅。」
採訪：朱芷瑩
