無綫對近期合約歌手頻頻違規極為震怒，除專誠聘請大狀重新修訂歌手合約外，總經理何定鈞在昨日有線娛樂新聞台啟播之日，更用「辣招」為有線贈興，嚴禁合約歌手亮相其他電視台，聲言無綫必與違規者解約。
本報日前報道，無綫對旗下合約歌手近日頻頻違規，在未取得無綫同意下接受無綫以外的香港電視台訪問極為憤怒，尤其是無綫發現旗下合約歌手近日為昨日啟播的有線娛樂新聞台拍攝宣傳片，明剃無綫眼眉。
近日不少無綫合約歌手和非合約歌手，均為無綫修改合約一事議論紛紛，至昨日，無綫總經理何定鈞在將軍澳電視廣播城接受訪問時，一再重申歌手應該尊重合約精神，更態度強硬地宣布，無綫會跟違規歌手解約。
何定鈞說：「所有簽約無綫歌星應該尊重合約精神，合約如果有漏洞，就要改善，係無綫合約歌手就唔能夠喺第二個台以歌星身份接受訪問。至於訪問形式，𠵱家啲歌星好多元化，好似佢哋宣傳電影，佢哋係演員身份，如果事前有通知無綫，以我個人理解應該係得，但係都要問吓法律部意見。」對於有歌手不贊成無綫特別為此修訂合約，何定鈞有其一套看法：「咁就要佢哋自己諗應唔應該，佢哋係可以唔同無綫簽約，有好多大牌歌星都唔同無綫簽約。」記者質疑無綫此舉是否針對有線娛樂新聞台，何定鈞說：「唔會，合約會因應環境改變，我都唔明點解有咁嘅報道。」
何定鈞一再強調，無綫是以身份界定歌手是否違反合約，而並非以語言界定，何定鈞說：「唔通佢用英文、日文、法文接受訪問又得咩？」何定鈞否認此舉是獨裁主義。當記者追問無綫若發現有違規個案如何解決時，他不假思索地說：「唯一嘅解決方法係同佢解約。」
阮兆祥前日往香港大球場欣賞球賽，入場時剛好碰到有線娛樂新聞台邀請接受訪問，但身為無綫合約藝員的祥仔，拒絕接受對方訪問，但女主持人仍窮追不捨，最後祥仔禮貌告知對方說：「你都知公司合約嘅問題唔係好方便，當朋友傾吓就冇問題。」
各唱片公司高層得悉無綫的「辣招」後亦立即表態，金牌唱片老闆黃柏高說：「以前喺公開場合有其他外地傳媒用國語訪問歌手，而有線個咪又放埋入去，咁先會令到我啲藝人喺有線亮相，既然𠵱家無綫咁明確表態，咁以後我哋會小心啲。」
新力唱片的王凱文說：「等我哋了解番先，問清楚無綫究竟乜嘢得乜嘢唔得，我哋會跟番合約。」問到盧巧音聲稱考慮不簽無綫，王氏謂：「佢只係話國語應該冇牴觸，觸唔觸犯合約會寫清楚，其實歌手用不同渠道宣傳，都係想有多啲機會啫。」
關心妍昨日在尖沙嘴出席一個活動時說：「我要問吓唱片公司先，咁我同無綫有合約，就要遵守佢嘅規則，聽公司同無綫嘅安排。既然我簽咗畀無綫，真係要聽無綫話。」
有份賀有線娛樂新聞台開台的Beyond在會場上說：「簽合約一個願打一個願捱，唔簽就冇事，簽咗又話獨裁就唔好囉，話封殺相信係針對新人。其實只有香港係咁，世界各地都冇咁樣，就係慣性收視造成，要睇有冇其他電視台可以打破慣性收視。」
郭富城與梁漢文昨晚到南華會出席商台活動打桌球，有線亦有派員採訪，但只拍攝城城，梁漢文則拒絕上鏡。城城說：「我同無綫有約，亦好尊重佢哋，但我一直都有用國語做有線訪問，等公司去了解吓究竟歌星同演員嘅合約點分。」
