收費台噚日直播巴塞隆拿對祖雲達斯嘅季前熱身賽幾精采，我求大俠捱眼瞓睇都抵，之不過兩個講波佬就唔多掂，連啲球員都唔係好認得，忍唔住要喺度話兩句。
睇咗收費台咁多年波，相信球迷大概知道唔同嘅聯賽會由唔同嘅講波佬負責，所以某啲講波佬會唔熟其他聯賽；就因為佢哋唔熟西班牙波，結果出現噚晚嘅尷尬場面。話說巴塞球員件衫有冧巴冇印名，於是上半場大部份時間佩奧爾、沙維同謝列特有波在腳時，兩個講波佬就口啞啞，而且連祖記方面嘅後衞比連度利，都係一句「阿邊個」就算。
我求大俠相信今次唔係無心之失，（雖然下半場確係有啲改善）。講真，巴塞同祖記都係歐洲一級球隊，講波佬連佢哋嘅球員都認唔到，重可以有乜期望？
金色轟炸機奇連士文返嚟嘞！據報話美國丁級聯賽嘅艾奧瓦藍星隊，最近有個叫格平根嘅好波前鋒，上陣八場入咗五球。幾經查核，原來佢就係鼎鼎大名嘅前德國名將奇連士文。三十九歲嘅佢為咗低調享受足球，用咗自己家鄉個名（Goppingen）去註冊比賽；真高招。
前日紐記同車仔響英超挑戰盃鬥到十二碼，紐記嘅真拿斯玩高章「chip」波，射到離行離列。有睇直播嘅朋友，應該睇到紐記領隊卜比笠臣谷氣谷到面都紅埋，佢賽後怒罵真拿斯離譜。又係嘅，輸波事小，態度唔好就唔值得原諒，真拿斯要檢討啦。
祖記同巴塞前日踢成二比二平手，新加盟祖記嘅歷高達利又甩波又輸十二碼，劣評如潮。我求大俠覺得佢被罰嗰十二碼好具爭議，而蒙迪路、費拉拿同埋杜林唔係後備就冇踢，令佢壓力好大，而且對住個濕水欖核沙維奧拿自然辛苦。我睇大家唔應該一鋪打謝佢，比多次機會佢啦。
立陶宛卡奧拿斯嘅王牌前鋒施歷斯，響啱啱過去嘅星期日不幸因車禍喪生。呢位前鋒係去季立陶宛聯賽首席射手，今季亦已經有五球進帳，腳風唔錯。卡奧拿斯冇咗佢如折一臂，短期內又搵唔切人嚟孭飛，佢哋響明日歐冠盃外圍賽主場對些路迪，真係唔知點算好囉。