陳小春、利嘉兒與陳松伶等噚日一齊出席港台喺沙田新城市廣場舉行嘅《廠出驕陽》宣傳。對於張栢芝喺台灣嘅性商店買鹹書嘅事，緋聞男友陳小春當時都係喺台灣，小春話喺台灣有同栢芝食過一次飯，不過就力撐對方唔一定係買鹹書，佢話栢芝可能係買啲靚寫真，又或者係買啲講男女之間溝通嘅書。
當問小春平日有冇同栢芝溝通呢啲問題，小春又話：「冇，點會傾男女關係，男女關係天生天養，一出世就識啦！」真係有啲矛盾喎。而黃凱芹噚日到黃埔出席宣傳時，佢話栢芝應該係去性商店買禮物畀朋友，重話睇吓自己有冇禮物收喎。
另外，一齊出席沙田做宣傳嘅利嘉兒，早前喺修身廣告話自己即將接任主持音樂節目，令人聯想到佢係接替陳松伶主持《勁歌金曲》，但其實並無其事。佢兩個噚日首次碰頭，記者要求佢哋合照，咁啱利嘉兒要上台，陳松伶就好大方企定定等咗成十分鐘，利嘉兒把口就話見到松松都唔尷尬，不過個樣就好唔自然囉。
陳鍵鋒最近憑新劇《律政新人王》人氣急升，噚日佢戴住副黑超到淘大花園出席一個活動，原來佢對眼變成大細眼，重不停流眼水，陳鍵鋒好無奈咁話：「前晚收工返屋企，隻眼已經有紅筋同流眼水，因為我眼睛一向都比較敏感，所以不以為意，點知一瞓醒見光就即痛，睇醫生先知右眼眼角膜受傷，醫生都有即時同我做咗小手術，不過我最擔心影響嚟緊嘅工作。」
謝霆鋒噚日去咗澳門為佢隻新歌《苦海孤雛》拍MV，問佢前晚點解去Eason生日會而唔去同老竇四哥慶祝舊曆生日，佢話：「我老竇都冇叫我去，不過我都有打畀佢同佢講生日快樂。」至於話佢老竇近日有新女朋友，霆鋒就話唔知。對於老友蘇永康傳婚變，霆鋒話唔講人哋嘅嘢，不過近排都有喺機場撞過對方一次。
梅艷芳噚日帶病去青衣城出席活動，佢有個台灣Fans專程飛嚟香港送咗個碧咸親筆簽名嘅足球畀佢，𠱁到阿梅鬼咁開心。阿梅話辭去東魅執行董事職務係唔想掛住個名義而無實際嘢做到，加上公司賣盤，所以件事同佢被傳與曾志偉不和係冇關係嘅。至於有關樂壇舞影行動件事，阿梅話佢出咗埠，所以唔係好清楚件事，不過佢話希望樂壇簡簡單單。
張惠妹前日喺台灣福隆海水浴場舉行最後一場演唱會，下晝阿妹就喺場地綵排，演唱會開始前，主辦單位搵咗間民宿畀佢梳洗，阿妹為咗減少去廁所，全日都盡量少飲水。前日阿妹喺台上同高大威猛嘅男舞蹈藝員大跳熱舞，令現場氣氛達到最高點，阿妹重感動到喊咗幾次。
