雖然香港經濟未見復甦，而本地嘅汽車銷售亦未有全面反彈迹象，但逆市下往往有出人意表嘅事情發生；部份車行為要刺激銷量惟有減價求售，但另一邊廂竟有代理唔夠貨賣噃！亞Mark所指嘅，咪係越野路華代理囉！近排佢哋部新版Freelander熱賣之餘，一直備受越野Fans關注嘅越野路華Defender，亞Mark早前披露過代理會引入嘅消息後，想唔到反應會咁踴躍，部車未正式抵港，代理就經已接到十多部定單，家陣首批Quota經已賣得所餘無幾㖭！咁又係呀！Denfender可算係越野路華有史以來嘅代表作，今趟代理重打破傳統引入長陣TDI柴油Turbo型號，車價都不過40萬上落咋！但大家係咪有啲奇怪，乜柴油車准入口兼唔使封窗咩？亞Mark聽聞若然原廠車符合規格就唔成問題，加上柴油偈響歐洲發展較電油偈更出色又環保，相信香港運輸署會順利通過㗎！若然你都係Defender嘅Fans的話，就不妨向代理查詢一下喇！