國足猛將李鐵最近搏晒命爭取表現，望嘅只係愛華頓一張長期飯票。佢前日響愛華頓贏格拉斯哥流浪三比二場熱身賽，射入一球世界波。可惜領隊莫耶斯無動於衷，賽後重話李鐵唔值一百萬鎊（約一千二百五十萬港元）喎，果然夠無情。阿鐵爺都係死心罷啦。
李鐵響下半場三十二分鐘落場後，第一腳掂波即刻接應隊友阿歷山達臣傳送，用右腳勁射入網，博得唔少掌聲。好嘞，諗住莫耶斯賽後會讚吓佢啦，點知佢就話：「我覺得用一百萬鎊去買李鐵，響𠵱家市道就確係太貴嘞。」
莫耶斯態度堅決，睇怕李鐵唔易如願。再講，前鋒朗尼響呢場比賽觸傷足踝，睇怕莫耶斯有排緊張，唔得閒留意李鐵啦啩。
曼聯隊長堅尼果然係個語不驚人死不休嘅人，最近佢就好勞氣咁彈朗拿甸奴，話對方有曼聯都唔揀，個腦一定係有問題喎。我求大俠覺得天大地大，又豈容一門一派妄自尊大？人哋唔加盟曼聯梗有理由。堅尼話踢埋今季可能收山，佢不如少說話多做事啦。
上季以借用身份踢熱刺嘅日本中場戶田和幸，自覺舊年唔能夠響英超立足，就係衰體能。佢返日本踢清水脈搏後，仍緊記失敗教訓，最近頻頻利用公餘時間跟欖球隊操練。佢咁做令我諗起英格蘭龍門占士早排都試過學玩美式足球，改進球技，球員上進永遠都抵讚。
意大利傳媒盛傳米蘭雙雄又想交換球員，國米用干斯卡奧換AC嘅馬田拿臣，各取所需。多年來好多人都質疑干斯卡奧嘅能力，不過你咪理，呢個葡萄牙中場踢過拉素、帕爾馬、國際米蘭呢啲強隊，𠵱家重有機會踢歐洲冠軍隊㖭，咁有強隊緣真係恨死隔籬。
巴西國腳盧斯奧想離開利華古遜，基本上唔係秘密，假如唔係早排同羅馬傾唔掂薪酬，本來已經加盟羅馬。最近有傳車路士個有錢老闆阿巴莫域治都睇中佢，盧斯奧當然唔放過呢個機會，打鑼打鼓承認知車路士想斟佢，擺明係向對方送秋波。