美國兩大流行偶像JustinTimberlake同ChristinaAguilera，近排拍住上喺全美國進行巡迴演唱，近日美國大型連鎖店Target幫佢哋出咗隻六首歌嘅碟，重只係賣五蚊美金（約港幣三十九蚊）咁平，可謂抵食夾大件。
今次呢張名叫《Justin&Christina》嘅碟，收錄咗佢哋每人三隻新歌，而且呢六隻歌之前冇收錄過喺Justin或者Christina嘅大碟裏面，fans一定唔會執輸。為咗催谷銷量，Justin同Christina齊齊幫百貨公司Target賣廣告，重一個崩都唔收㖭，點解？我羅拉聽講佢哋兩個嘅巡迴演唱會喺尾期銷情麻麻，為咗谷宣傳，梗要出吓法寶喇！
其實Christina同Justin呢pair偶像，曾經傳過緋聞，今次巡迴嘅主辦商亦係為咗呢個原因，撮合佢哋企圖製造話題。可惜Justin最近同金美侖戴雅絲（CameronDiaz）拍拖，有傳fans為咗杯葛Justin公開戀情而唔睇佢嘅演唱會，而暴肥嘅Christina亦嚇走唔少fans，所以計我羅拉話，若果佢哋再唔合作催谷吓，又點可以挽回聲威呢？