英皇娛樂一向篤信玄學，呢排英皇咁多事發生，捲入樂壇貪污案又未知結果，老細楊受成上個禮拜已經特登飛咗去泰國拜白龍王，而涉案嘅英皇高層霍紋希，噚日就有人見到佢同幾個女仔喺沙田車公廟出現，其中有個女仔重貌似鄭希怡（Yumiko）。
舊年已故英皇歌手羅文病重時，撞正謝霆鋒官司纏身，嗰排英皇是非多多，聽聞霍紋希嗰時都有去車公廟拜神，祈求公司各人平平安安。而霍紋希早排曾經陪謝霆鋒去成都拜神，當時佢點七星燈，重有幫埋老細祈福許願，睇嚟佢對「拜得神多自有神庇佑」呢句話深信不疑。
不過噚日見到霍紋希嘅人話佢一臉憂色，唔知呢次佢又會唔會好似上次喺成都咁，順道為主祈福呢？
葉世榮前晚到新城接受訪問，佢嘅EP碟《記得你》就快推出，而同名歌曲係為已故女友許韻珊而特別作嘅。另外佢正同黃貫中、黃家強籌備Beyond巡迴內地嘅演唱會，世榮話：「下月尾會去北京演出，嚟緊會喺上海同廣州演出。」
黃凱芹噚日出席喺時代廣場舉行嘅「畢業生節」，佢話大會搵佢做呢個活動嘅嘉賓真係搵啱人，因為佢考過四次會考，最後一次重考得好好，雖然未至於做狀元，不過佢話唔係榜眼，都應該係探花，佢重奉勸年輕人千祈唔好睇低自己嘅能力。
陳司翰拍完台劇之後，近排回流返香港，而且會幫香港電台主持一集嘅《10分動畫》英語節目。陳司翰喺節目度扮動畫家，攞住支大鉛筆介紹動畫《笨鳥手札》，但個樣睇起嚟似拍緊MV多過教講英文，不過佢以前喺英國讀書，講英文純正得嚟又流利，唔會教壞細路。
賭王何鴻燊嘅胞妹何婉琪（十姑娘），前晚同兒子麥舜銘、媳婦陳復生到將軍澳電視廣播城錄影鄭裕玲（嘟嘟）主持嘅《智趣相投——不一樣的對話》。
問嘟嘟十姑娘有冇話邊啲問題唔問得？嘟嘟話：「有關何生（賭王何鴻燊）、官司同感情問題都唔問得，佢都係講吓童年往事。」
組合EO2、李蘢怡同埋MiniCookies噚日喺黃埔新天地出席「海皇義工互動光碟啟航日」，李蘢怡同EO2組隊，同MiniCookies鬥快用筷子夾油炸鬼同煎堆，點知EO2嘅成員Eric慢得滯輸咗。事後Eric話：「我揸筷子手勢好正統㗎，不過冇力咋。我試過用公筷用到當係自己筷子，食完飯有三對筷子。」
