喺將於嚟緊九月舉行嘅法蘭克福車展上，將會有多款新車展出，就連德國歐寶車廠亦唔例外，佢哋會響會場內展出全球車迷期待已久嘅全新一代Astra車系㖭！
廠方響日前公布嘅資料中顯示，新一代Astra車系將有多達五台電油及三台柴油Turbo引擎供用家選擇，容積由1.4至2.0公升，馬力輸出則由80匹至最高200匹；其中一台輸出170匹馬力嘅2.0公升電油Turbo偈，更屬於全新設計㖭！同時，廠方響強化新Astra底盤結構嘅同時，亦增設有多套裝備如CDC、ABS等等，務求令車子可有出色嘅表現。
至於外形方面，新車亦予人一份好感，皆因廠方特別為其設計出一個極富流線型嘅外形，而同屬全新設計嘅鬼面罩，襯以炯炯有神嘅頭燈組合，看來份外吸引突出；除此之外，由於車身尺碼有所增加，其中長達2610mm嘅軸距，從而能為車上乘客帶來寬敞闊落嘅乘坐空間。