上星期唔知花旗市搞緊乜，應升唔升應跌唔跌，加埋老懵董之前承諾推出拯救香江經濟嘅行動又冇晒聲氣，結果個市喺冇乜方向下又跌番落一萬點樓下。伏勝覺得個市唔係好正常，到月尾重有咁多未平倉合約，分分鐘有機會嚟一次大挾倉，各位炒家自己執生。
呢排啲芬佬確係好唔得閒，伏勝有個做基金經理嘅朋友，近排一次過入咗6隻工業股，其中一隻係啱啱用1蚊批完股嘅華豐環保紡織（364），聽講管理層對隻股極度睇好，話嚟緊一年嘅業績會有強勁增長，到時一定派大息酬謝各界支持。
雖然隻股喺批股復牌後，由之前1.22元最低跌過落1.06元，但承接力一啲都唔曳，上星期五收市重升返上1.19元。聽班大戶講，隻股重未玩完，因為喺兩次批股中，重有好多芬佬攞唔到貨，有人私下要求再批多一次股，不過班大戶就唔係咁想，因為要顧及已接貨嘅基金，結果班芬佬只好喺市場買貨。如果喺呢個水平都買得咁博，隻股前景應該幾有睇頭。
最近好多股仔喺基金入股下勁升幾成，於是突然多咗一班專幫人搵基金入股嘅行家，希望可以額外撈多一筆油水。聽聞喺上年批過股畀個美資基金嘅新興光學（125）可能喺短期內有動作，伏勝查番佢去年嘅公布，原來佢哋喺舊年年尾已經邀請咗ValuePartner入股，重揸咗一成幾。ValuePartner係邊個？咪就係呢排令到好多隻股仔點石成金嘅「惠理基金」囉。今次班揸咗新興光學嘅大戶可能係睇到近排嘅「惠理效應」，希望可以借佢哋個大名嚟炒高隻股，大家不妨望多兩眼。
伏勝