我求大俠都有留意日本職業聯賽，都知道經常有大比數賽果出現，好似噚日六場賽事，竟然有二十五個入球，其中一場更加出現作客狂數對手八球罕見賽果！
神戶勝利船對大分三神賽事，作客嘅大分三神毫不留情，淨送最後得九人應戰嘅主隊八隻光蛋，我求大俠記憶中，呢個比數真係好少見，就算大敗，主隊都起碼入番一、兩球，輸得無咁肉酸。
其實，日職業聯賽客隊贏波絕不出奇，因為部份球隊實力弱，主場都無優勢，噚日六場埋單計，有四場作客W，總入球出現三球或者以上機會率高，今日重有兩場賽事進行，值得留意。
雖然車路士買人買到㷫烚烚，而且日前又可以數大馬，但係我求大俠仍然好掛住返咗去意乙卡利亞里嘅蘇拿，尤其係佢日前踢第一場季前熱身賽，喺四十五分鐘之內獨取四球，老而彌堅，更覺得佢呢種咁技術型嘅球員，唔可以喺英超或意甲繼續顯技而感到好可惜。
阿根廷中場列基美係一個有質素球員，可惜冇辦法融入巴塞，終於俾人放棄，𠵱家佢重未有班落，聽聞有意返去小保加，而小保加名教練比安基亦向佢張開雙手，歡迎佢返嚟，話唔忍心見列基美咁好嘅球員搞成咁，所以我求大俠話球壇仍然有情又有義，唔係淨係講金！
踢波嘅嘢受傷好難免，但係好似曼城夏蘭特因為俾曼聯隊長堅尼報復，踢傷咗膝頭好唔番，終於喺日前宣傳布排靴確係少見。我求大俠心諗，一個靠踢波搵飯食嘅人冇咗搵食技能，真係一件慘事，希望佢可以成功循民事訴訟告到堅尼，下半生有番啲渣拿就好喇！
NBA球星拜恩嗰單強姦官司發生嘅科羅拉多州真係唔好彩，三個月前嗰度有一單類似案例，被告同原告更加係朋友關係，兩個人作供重承認飲過酒同食大麻，冇身體受傷證據，睇嚟情況有利過拜恩，點知最後罪名成立，判咗十六年；今次真係要睇吓拜恩嘅律師夠唔夠「牙力」嘞！