陳奕迅（Eason）今日二十九歲生日，歌迷昨日在粉嶺為偶像預祝牛一，Eason的父親陳裘大亦有到場，陳父表示希望兒子可以多抽時間回家飲湯。Eason更與歌迷放孔明燈。
有線娛樂新聞台的工作人員昨日亦有訪問Eason，但已除下咪牌。對於有線娛樂新聞台走無綫歌手合約法律罅，找歌手做訪問，曾為有線娛樂新聞台宣傳的Eason說：「制度唔係一個人定，歌手係會聽公司安排，我好被動，當然希望多啲媒體宣傳。」
對於有報道指謝霆鋒送了一隻約五萬元的手表給Eason，他說：「霆鋒係送手表畀我，但唔知價錢，如果咁貴我會鬧佢，我知佢呢排好窮，留番啲錢傍吓身！」有雜誌指Eason和女友徐濠縈情變，他說：「我哋好開心，感情穩定，佢都送咗生日禮物畀我。」
此外，盧巧音昨日出席新城娛樂台活動，對於有周刊報道指好友徐濠縈與Eason情變，盧巧音對此說：「我不嬲當佢哋係兩公婆，佢哋重好相愛，阿徐成日煲湯攞去片場畀Eason飲。」
採訪：李珮洳
攝影：仇志德
