陶大宇與太太黃寶慧同居十年，兩人在大前年結婚，到今年底已結了婚三年，去年大宇表示很享受二人世界，暫時不會生孩子，但現在他跟太太已有共識，決定不生兒育女。
大宇說：「我哋決定唔生，因為我太愛小朋友。𠵱家乜嘢世界呀？讀完大學出嚟都係做侍應，你話恐唔恐怖呀？唔係唱衰香港，大學生都要爭五、六千蚊嘅人工，係咪黐線㗎？我對呢個世界冇乜信心，做人父母一泡眼淚，個社會風氣有太多問題存在，生細路好大責任㗎。」
十三年的相處日子中，大宇與太太自有一套相處之道，他說：「我畀佢嘅空間好大，同樣佢畀到我空間，我未同佢結婚前都同居咗十年，大家已經好了解對方。」
大宇與歐陽震華（Bobby）夫婦亦十分有緣，他跟Bobby因拍攝《茶煲世家》一劇而結緣，兩人的友情已長達二十載，當年Bobby介紹阿寶給大宇，後來阿寶又介紹Bobby的太太傅潔嫻給他認識，所以這兩個男人真的有緣有份。
大宇一提起Bobby就大笑起來，他說：「我同佢幾有趣㗎，其實我哋絕對係兩個世界嘅人，佢做嘢幾穩陣，而我就粗心大意，但大家都爛玩，我哋好了解對方。我相信同佢已經超越咗朋友呢兩個字，佢係我圈中嘅知己，重有魏駿傑啦，我哋拍《刑偵》時識嘅。」
與陶大宇訪問當日，記者剛巧約了唐寧在銅鑼灣拍照，她知道大宇在隔籬街，即時嚷着要探對方。五年前，大宇拍攝內地劇《乒乓》，那時仍用原名江麗娜的唐寧還未滿十八歲，她在劇中扮演大宇的妹妹。日前這兩「兄妹」會面，二人笑個不停，大宇還讚她：「大個女喎，靚咗喎，𠵱家有女人味啲。」
唐寧自《乒乓》後第一次見大宇，這是緣份，正如大宇一樣，重返無綫是緣份，原來早前他的經理人阿佳在一個飯局上，偶然遇上珍姐，之後雙方就斟洽大宇拍劇一事，於是六年來的恩怨情仇就化為烏有，「師奶殺手」亦得以重生。
撰文：朱芷瑩 攝影：陳偉權
部份衣服提供：SistyrMoon
場地提供：decorcollection（CausewayBay）
