相信大家響馬路上揸車時定必小心謹慎，盡量避免意外發生；但可惜路面環境變幻莫測，有時因為其他道路使用者疏忽、天氣、甚至係路面上嘅障礙物，而令你發生交通意外。故此，大家不妨參加一啲防衞駕駛技術課程，以便於緊急時作出應變自救。
最近，皇冠車行就特別安排一班新近購買旗下品牌（豐田、凌志及大發）嘅車主，參加一個由佢哋及香港駕駛學院合辦嘅「豐田防衞駕駛課程」，內容包括利用視像形式探討各種意外成因，導師又會教導學員點樣去控制自己駕駛情緒，同埋緊急應變技巧，當中更包括汽車打滑嘅原因及處理方法等等。
課堂後，有關方面更安排學員駕駛經過特別製造嘅「打滑車」，並由專業導師控制，利用氣壓原理製造推頭、甩尾及四輪打滑情況，而每種情況都有不同級數調校，從而讓學員利用於課堂上學到嘅技巧，來控制模擬失控汽車，並希望從中為佢哋帶來一啲正確嘅駕駛態度，以及遇到緊急情況時嘅應變方法，盡量避免意外發生。