上星期日本欄寫《尖子唔讀中七》，估唔到引起啲中七（應屆高考生）寫嚟幾封電郵，指尖子入大學唔公道，又指左丁山唔識詳情。
既然咁講，左丁山搵咗一位科技大學名牌教授L問吓，教授L話：「我哋每年收中七高考生，有一定名額，今年冇變動，因此一啲中七生話我哋預留咗八成學額畀尖子，並非事實。」
尖子入學，與中七生入學，有乜唔同呢？教授L話：「根據過往數字，我哋做過研究，將學生大學畢業攞honour嘅表現，與中七高考成績及中五會考成績做correlation（相互關係），發覺中五會考成績嘅預測能力最強，因此知道會考尖子多數在大學有好成績，其中又以英文成績嘅預測能力最強，會考英文唔好嘅學生，入到大學多數唔掂！另外，我哋今年在暑期為進入科大嘅尖子開班，等佢哋適應大學課程，𠵱家發覺百分之九十幾嘅尖子完全冇問題。」
即係話，啲尖子讀完中六入大學，好過讀中七好多。二十世紀八十年代，中大實施暫取生制度，唔少名校嘅會考尖子，讀一年中六就直入中大，放棄中七，搞到啲名校鬼殺咁嘈，啲尖子入到中大又讀得好好喎，唔知幾開心。今日大學收尖子，並非新生事物，中大「暫取生」年代，早已有數據證明會考尖子與大學honour有強烈相互關係，唔信可以問吓王于漸教授。左丁山成家人都冇讀中七就入大學，其中兩個攞一級榮譽，兩個攞二級甲等，一個GPA3.54，感覺非常良好，讀中七係嘥時間，逼住讀就冇辦法啦。