港股今個禮拜調整，主要由電訊及地產股帶動。新地（016）連跌4日後，噚日終於反彈，由低位42.60元抽番上44元收市，力度相當強。
睇番新地技術走勢，噚日稍為跌穿20日線即時大反彈，9RSI跌至50中軸亦回升，加上10日線保持上升，先前回吐只屬健康調整，技術走勢仍向好，可伺機吸納新地Call輪博反彈。
新地Call輪中，數據仍以9786較靚，噚日大幅回升18.5%，收41.5仙。隻輪10月初到期，行使價41元，溢價2.6%，槓桿率10.6倍。
正股短期有機會重上46元水平，9786博得過，短炒40仙附近買入，正股跌穿20日線止蝕計數。
和黃（013）今個禮拜未升過，全周跌2.25元，跌幅4.3%。不過已連續3日守住50元收市，反映20日線支持力唔差，隨時反彈回51元樓上，甚至升穿近期高位52.75元。中長線而言，和黃係恒指主要希望，恒指如果要上萬二，和黃係必然火車頭。
和黃Call輪短炒吼9765，噚日收0.28元，升3.7%，正股未郁佢先郁。9765於9月到期，行使價49元，溢價3.6%，槓桿率17.9倍，數據在和黃輪中算靚。和黃收赫斯基9億元股息，股價下周一或反映，9765可短炒。
章盛